港聞

港聞二

【Emily】睇音樂劇 會場中途亮燈開到尾 嘆損氣氛 曾俊華:第一次見

【明報專訊】前財政司長曾俊華呢兩個星期活動多姿多彩,去亞博館睇劍擊賽,又去西九戲曲中心睇音樂劇The Sound of Music。不過,曾俊華都有嘮叨,話同太太帶埋孫女三人行去睇歌劇,大讚演員嘅唱歌水平、水準極高,但場地運作就有問題,佢話佢睇嗰場場地燈光「唔係好聽話」,喺表演中途全場燈光亮起,一直開到尾,好影響現場氣氛,而呢啲咁蝦碌嘅情况佢都係第一次遇到,「話晒過去,我哋都係一流嘅國際大都會嚟嘛」。

曾俊華都有講番啲開心事,就係上周末去亞博館睇國際劍擊聯會(FIE)花劍世界盃賽事,見證港隊男團世盃首次奪金。曾俊華講起當日情况,話大家睇到張家朗取得致勝一劍之後,觀眾歡呼聲嘈到拆天,形容 「熱血沸騰」,好耐都未能平復。

睇花劍賽「熱血沸騰」

話聽講德國棄辦賽事

曾俊華話,聽番場內嘅朋友講,呢輪男子組賽事原本係由德國主辦,但基於俄烏戰爭,德國政府唔想向俄羅斯運動員發出簽證,以免被在野黨派攻擊,最後索性棄辦,而原本主辦女子組比賽嘅墨西哥,喺年初因為運動場倒塌,又決定放棄主辦,香港劍總其後先至成功申請接辦,仲係短時間內籌辦成功。曾俊華以前有教劍擊,佢話喺場內撞番一大班舊劍友,大家一齊睇比賽,一邊談舊事,過咗一個難忘嘅周末。

相關字詞﹕劍擊 劍擊世界盃 戲曲中心 曾俊華

上 / 下一篇新聞