港聞

港聞二

【Emily】46年興華茶餐廳7.31結業

【明報專訊】開業46年嘅柴灣興華茶餐廳宣布做埋7月31日就結業,老闆娘阿仔解釋唔係因為加租或生意差做唔住,只係剛好租約期滿,加上老闆娘同師傅年事已高,不如等老人家退休歎世界。唔少網民留言祝老闆娘同師傅退休生活愉快,紛紛稱讚興華嘅葱油炸雞髀無得頂,結業前一定要食多次。

少東:想阿媽同師傅退休歎世界

興華茶餐廳喺facebook話衷心感謝街坊朋友40幾年支持,茶餐廳位置雖然偏僻,近幾年都有好多區外客特登幫襯,亦有客人喺疫情最嚴重時每日叫外賣,令茶餐廳有一定收入,非常感激。老闆娘阿仔話茶餐廳裝修46年來大致一樣,地磚、大門、鐵閘、玻璃等由開業用至𠵱家,唔少老街坊幫襯時都會懷緬一番。

上月係老闆娘生日,阿仔出帖講述阿媽同舖頭嘅故事,提到爸爸27年前患末期癌症過身,當時佢只有1個月大,阿媽一手一腳經營茶餐廳養活兩母子。以前茶餐廳只有邨內街坊幫襯,營運模式簡單,後來阿仔「搞亂檔」,唔少熟客無再出現,甚至喺門口話茶餐廳係「曱甴店」,但同時吸引唔少區外朋友遠道而來支持,相信帶到另一種開心畀老闆娘。

相關字詞﹕興華茶餐廳

上 / 下一篇新聞