【明報專訊】歌手Tyson Yoshi早前將印有英文粗口嘅保時捷跑車泊喺上環街頭，引來一班天主教總堂區學校嘅小學生圍觀，不過事件無惹來校方批評，日前校方仲邀請佢為學校頒獎（圖右二）。
噚日學校喺facebook上載日前學校才藝表演同頒獎禮嘅短片，見到Tyson Yoshi現身。Tyson前晚亦喺Instagram（IG）上載短片，片中佢用英文向在場家長、學生道歉，話自己唔應該喺嗰度泊車。
Tyson頒獎後再同在場學生分享有關事業嘅選擇，「如果為興趣嘅話，鍾意做就繼續做啦」，但唔建議係為搵錢或者出名，仲話希望小朋友做所有嘢都以開心為主，但就提醒佢哋唔好犯法。
Tyson早前將一班小學生圍觀佢部保時捷嘅短片放上IG，其後學校回應佢嘅帖文，邀請合作，話希望用「文字嘅魔力」（The Power of Words）為題，畀同學思考點樣設計車身。Tyson應承選出作品再畀公眾投票，勝出作品會印喺朋友嘅座駕車身，最終結果已「出爐」，設計以綠白兩色為主，並有「Tyson Yoshi」字樣嘅拉花。