【明報專訊】不少人去外地旅行都會買當地交通工具嘅「Day Pass」（日票），方便搭車亦可以慳錢，聽日起九巴都會推出「旅客日票」，畀旅客喺一日內無限次坐巴士去不同地區。每張旅客日票55元，旅客啟動日票後24小時內，可無限次坐九巴及龍運巴士逾450條路線，包括日間線、通宵線、賽馬日馬場專線、來往陸路口岸嘅B1及B9線等。
旅客可以喺網上或19個指定銷售點購買日票，當中包括多個出入境口岸巴士總站，例如機場、落馬洲站等，以及多個遊客常到地區如尖東等；或者可以透過九巴嘅手機應用程式「App1933」入面嘅eCoin頁面，選擇購買日票，輸入護照首4個字母及數字，然後用電子支付畀錢，之後網上系統就會發出16位啟動密碼，旅客用該密碼喺應用程式內啟動日票，上車時喺巴士收費器掃描日票乘車二維碼就用得。
