【明報專訊】司法機構噚日宣布，金鐘高等法院大樓由今個星期六（27日）起加強保安措施，保安檢查會擴展至所有樓層；所有進入大樓嘅法庭使用者都要接受安檢，防止攜帶刀、鉸剪同液體等違規物品。司法機構話，保安檢查程序需時，促請法庭使用者提早到達高院，尤其係朝早或午飯後嘅繁忙時段。
𠵱家市民進入高院大樓1樓至14樓，要放低袋或背包做安檢，如果發現有水、咖啡等液體就要倒走。周六起實施新措施後，大家進入高院所有樓層都要倒水，但唔少樓層都設有水機，可以自己帶水樽斟水。Emily同好多法庭記者喺低層1樓記者室做嘢，平時會買咖啡、米線等流質食物同飲品，帶返記者室一邊打稿一邊食。新措施下，出入記者室都要做安檢，就算等陪審團退庭商議等到夜晚，行家都無得帶流質食物返去。
