【明報專訊】噚日喺「香港全民閱讀日」，唔少政府部門都籌辦活動響應，廉政公署就舉辦咗3個活動，分別喺總部做「ICAC兒童教室」，由廉署人員同小朋友共讀新推出嘅繪本《小啡豆周圍走——深水埗篇》，藉故事帶出負責任同誠實嘅價值觀；又喺240多間中小學舉辦閱讀推廣計劃，仲有網上舉辦親子閱讀活動。教育局同康文署亦合辦「中小學聯校共讀半小時」活動，以「中華經典名著」為題，約220間中小學共7.5萬師生透過線上及線下參與。
聯校共讀 小學生扮諸葛亮分享
廉署噚日嘅「兒童教室」，除咗讀繪本，仲同學生參與「小啡豆」手工活動，製作故事內容相關嘅飾物，令小朋友更加印象深刻。至於「共讀半小時」，就有包括來自筲箕灣官立小學嘅學生扮演《三國演義》嘅諸葛亮，同埋《西遊記》嘅唐三藏，向在場人士介紹角色經歷同價值觀。
除咗政府部門，立法會議員顏汶羽噚日開放觀塘區5個議辦一個鐘，畀市民用作「共讀點」，仲邀請觀塘區圖書館高級館長參觀順安邨「共讀點」。議員林素蔚同吳傑莊都喺facebook宣傳閱讀日，推介書籍畀大家。