【明報專訊】佐敦道華豐大廈今個月10號發生5死40傷三級火，民建聯立法會議員鄭泳舜噚日聯同區議員黨友，同消防處長楊恩健及一眾當日出動嘅消防義工見面，向義工隊致送感謝狀，感謝消防員救火之餘，一眾義工亦喺前線支援居民。鄭泳舜話，火災當日除咗「無名英雄」、街坊、關愛隊及酒店業界外，仲有一眾消防義工隊逐戶拍門確認居民係咪有離開，同時幫遊客同居民搵番重要證件，又安撫居民。
另外，經民聯梁美芬噚日約見保安局長鄧炳強。梁話一直關注《消防安全（建築物）條例》，有意提出私人修訂，華豐大廈大火後，鄧炳強積極回應佢嘅建議，仲答應快馬加鞭修例，所以梁放棄提出私人修訂，預計政府修例最早可望7月喺立法會審理。
相關字詞﹕《消防安全（建築物）條例》 華豐大廈 華豐大廈三級火
