【明報專訊】文化體育及旅遊局長楊潤雄上周五（威尼斯時間19日）去到意大利威尼斯，主持威尼斯視藝雙年展香港展開幕禮。佢噚日喺facebook講番其後參觀展場嘅體驗，見到楊潤雄（左）以吊腳長褲、船襪黑鞋嘅潮look現身藝術場地，並參觀藝術家徐冰（右）嘅展品。楊潤雄話，徐冰剛剛做咗香港文化推廣大使，而徐老師今次喺威尼斯就有一個「徐冰：藝術衛星—首部在太空拍攝的動畫影片」展覽，其中一項展品係要瞓喺梳化椅，望住設於屋頂位置屏幕播放嘅太空投影片，感受太空之旅。
香港都有幾名藝術家去到當地參與，楊潤雄話佢參觀咗陳世英「超越」，以及莊偉嘅形體錄像和現場演出Falling Reversely，及同兩人交流。佢話威尼斯視藝雙年展係當代藝術嘅國際大舞台，喺呢度展出作品肯定能吸引更多目光，有更大迴響，達至中外文化藝術交流，政府藝術及體育發展基金每屆會資助香港藝術家去雙年展參展。