【明報專訊】自資院校香港珠海學院（下稱學院）最近有人事變動，喺2022年底接任校長嘅陳致，今年2月公布回巢，返內地珠海「北師港浸大」（UIC）做校長。Emily留意到，學院校網「管理架構」版面今個月更新咗，顯示由常務副校長張珍做署理校長，但撳入「校長的話」嗰版，下款就話署理校長叫「張楨」，至於「校董會」成員名單嗰頁，就稱呼佢做「ZHANG Jane女士」，一個校網有唔同嘅名。Emily向校方查詢後，噚晚見網站「校長的話」文章下款，已改番做「張珍」。
學院傳訊及公共關係處噚日同Emily講，署理校長正確嘅名係「張珍」。睇番校網介紹，話張珍1992年獲北京大學法學學士學位，1998年獲美國賓夕法尼亞大學法學碩士學位，曾經喺中外教育機構做管理要職。
校長「張珍」變「張楨」
張珍喺「校長的話」欄目話，校方致力將學院發展成一間「文、理、商並重的應用型綜合私立大學」，又話學院正迎來全新里程碑，佢期待帶領學院喺香港呢個中西文化薈萃之地站穩，並依靠日益繁榮同強大嘅祖國，共同努力，為社會培養更多具備中國情懷、國際視野同社會責任感嘅優秀人才。