港聞

港聞二

【Emily】過年抄牌 一哥:盡量酌情唔一刀切

【明報專訊】警務處長蕭澤頤早前提過農曆新年期間「抄牌」會酌情處理,而近日部分地方仍然有違泊車輛被發告票。警方喺前年共發出超過336萬張「牛肉乾」,平均每日9205張,蕭早前就話去年發出告票嘅數量比前年少一成。佢近日至少3次被追問過年期間會唔會顧及社會氣氛,減低執法力度,佢噚日回應時重申,會盡量喺可行情况下行使酌情權,但就提到如果一刀切唔抄牌,「大家想像一下可能會發生嘅情况係點樣呢?」強調唔希望因為大家一啲不負責任行為,引致行人要冒險走出馬路。

據政府資料,涉違泊抄牌等交通違例定額罰款收入喺2023/24年度預算嘅收入約13億元,同2014/15年度、即係10年前嘅3.7億元相比,收入增加兩倍半。

中國香港汽車會永遠榮譽會長李耀培噚日喺港台節目《千禧年代》就話,香港違泊問題同車位不足有關,以私家車為例,計及夜間停車同埋出行,一架車平均需要1.7至1.8個泊位,但根據運輸署舊年數字,每架私家車就只係有約1.1個泊位。

相關字詞﹕蕭澤頤 違泊 抄牌

上 / 下一篇新聞