港聞

港聞二

【Emily】深水埗現「魚蝦蟹」賭檔 9人被拉

【明報專訊】網上噚日有人發帖標題寫「嘩...海鮮檔」,相中見到有人喺深水埗北河街排檔出面空地開「魚蝦蟹」賭檔,吸引部分人圍觀,綠色嘅蝦蟹都有人落注。多個網友留言話「好似早幾年成日都係咁」、「天仙局」、「開小販檔就趕、開賭檔就乜都唔理」。便衣警員喺附近加強巡邏,噚晚約8點喺福華街143號出面拉咗9個男子,大部分係非華裔,全部帶署扣查。行動中檢獲一副「魚蝦蟹」及賭款。

張相見到個位喺北河街近鴨寮街,兩個排檔中間嘅空地,檔嘢用膠櫈及木板組成,鋪咗張「魚蝦蟹」紙,頭戴漁夫帽疑係主持坐喺「大公無私 翹骰不算」嗰邊,前面有兩隻兜對冚搖骰,有人用紙幣「買蟹」,一名黑衫男人烏低身數錢,面前放咗幾百蚊「買蝦」,附近有十幾人圍觀。

記者噚日根據張相去番嗰度,唔見有賭檔,附近排檔大部分因新春無開,但有好多人擺地攤,附近商販都話無見過賭檔。

根據第148章《賭博條例》,任何人如在賭場以外嘅任何場所或喺任何街道上營辦或管理或以其他方式控制非法賭博,即屬犯罪,一經定罪可罰款5萬元及監禁兩年;任何人於街道上非法賭博最高亦可被罰款5萬元及監禁9個月。

相關字詞﹕非法賭檔

上 / 下一篇新聞