港聞

港聞二

【Emily】汀角餘小量海龍 環保人士憂水質變差

【明報專訊】即將踏入龍年,香港原來有「龍」出沒,Emily講嘅係海龍,同海馬一樣屬於「海龍科」。綠色力量曾經做過海龍同海馬調查,話海龍身體又窄又長,繁殖方式好特別,係由雄性負責懷孕同孵化;海龍同海馬嘅分佈範圍都較稀疏,繁殖力偏低,兩者都有藥用價值,同樣面臨過度捕撈威脅。

Emily請教多年來自發做生態調查嘅關祝文,佢話大埔龍尾泳灘亦曾現海龍蹤影。佢喺2008至2018年持續去龍尾記錄物種,曾錄得超過400種,但政府發展人工泳灘後,龍尾2021年重開,佢留意到水質變得污濁,亦慨嘆過往見到嘅唔少物種都「消失」,佢都漸漸少咗去。

政府當年為補償龍尾損失嘅生境,提出「汀角+」汀角海岸生態保育計劃。關祝文話,佢都改為去汀角觀察,想比較同龍尾嘅情况。佢話汀角有小量海龍出沒,同時有海馬、八爪魚、日本絨毛蟹、牛鰍魚等至少「三數十種」生物。不過,佢擔心汀角嘅水質開始變差,形容汀角係「被遺忘嘅地方」,「雖然冇其他人幫手(做生態調查),但對呢個地方有感情,所以繼續做」。

翻查資料,綠色力量喺2012年臨踏入龍年前,發布全港首個系統性海龍同海馬調查,當時話海龍多數喺香港西面近岸水域出沒,相信東涌河口近岸水域係佢哋繁殖及育幼嘅生境。

相關字詞﹕龍年 關祝文 生態調查 海龍

上 / 下一篇新聞