港聞

港聞二

【Emily】提特權法查美斯事件? 吳傑莊澄清誤會

【明報專訊】球王美斯周日(4日)喺國際邁阿密對香港隊嘅賽事因傷缺陣,引起球迷不滿,唔少立法會議員連日喺facebook出帖批評。本報噚日報道,議員吳傑莊致函內委會,要求討論以《立法會(權力及特權)條例》調查事件,並傳召主辦機構相關人士同埋索取相關合約、文件,信件喺立法會圈子流傳。不過,吳傑莊噚日同Emily澄清話未去信內會,強調只係一個「美麗嘅誤會」。佢話要動用到特權法「係比較大嘅一件事」,需要綜合考慮,「去到呢一刻(噚日)我都未覺得有需要咁做」。

吳傑莊解釋,前日佢同事確係草擬咗一份文件畀佢參考,當中列出動用特權法,只係為咗探討特權法係咪可行方案之一,一方面為球迷討回公道,另一方面令球賽主辦方Tatler Asia解釋整件事嘅來龍去脈。

強調對焦主辦方 唔怪美斯

對於政府、香港同內地球迷連日對美斯缺陣表達不滿,吳話佢只係對焦主辦方Tatler Asia,唔會「衝出嚟」怪責美斯同國際邁阿密,強調整件事係主辦方對球迷嘅商業行為「貨不對辦」。

相關字詞﹕特權法 Tatler Asia 吳傑莊 國際邁阿密 美斯

上 / 下一篇新聞