港聞

港聞二

【Emily】李家超林村同長者食盆菜 寶牒一拋即中

【明報專訊】今日年廿九喇,全港多區都有唔同嘅夜市。特首李家超噚日就聯同民政及青年事務局長麥美娟、大埔關愛隊去咗大埔林村家訪,派福袋畀長者同幫佢哋貼揮春,並喺92歲侯婆婆屋企試食傳統嘅炒米餅。李家超之後去咗同約100名長者一齊食盆菜,同埋派福袋,致辭時祝福長者龍騰高飛、身體健康。

李家超之後去咗「林村許願夜市」,巡視攤檔期間同寶牒檔主傾偈,話𠵱家社會係由團結變到更團結,呼籲大家一齊拼經濟同發展,其後佢用咗100元添香油同拋寶牒,個寶碟寫咗「香港龍騰新程 市民身體健康」,仲一拋即中。佢之後喺facebook話,有許願樹嘅「加持」同埋政府、社會各界努力,必定會願望成真。

高官7區探單親家庭長者等

高官近日都陸續家訪及派福袋,由民政事務總署統籌。噚日除咗特首,仲有律政司長林定國、文體旅局長楊潤雄、醫務衛生局長盧寵茂等官員去咗東區、黃大仙、九龍城等7區家訪,佢哋去咗探望單親家庭、有需要人士、獨居長者、雙老家庭等,嚟緊會繼續探訪。

相關字詞﹕家訪 關愛隊 林村許願樹 李家超

上 / 下一篇新聞