港聞

港聞二

【Emily】無緣與偶像較量 港將集郵補數

【明報專訊】國際邁阿密同由港超球員組成的香港隊踢表演賽,雖然球員都對美斯同蘇亞雷斯無落場感到遺憾、失望,但有港隊球員仍有收穫,喺球場上成功同到兩大球星「集郵」,算係有番個「安慰獎」。

美斯今次未有落場之餘,賽後喺更衣室亦未有應一眾港隊球員要求簽名,例如港隊後衛李毅凱事前準備咗3件阿根廷球衣,未能有球王添筆,但呢位29歲港將就成功喺頒獎典禮時,喺球場集齊同美斯、碧咸、蘇亞雷斯同布斯基斯等球星合照,都算豐收,但佢都承認對未能同場較量感可惜,「唔止球迷,其實我哋都對美斯和蘇亞雷斯無落場感失望,但無辦法,唯有等下次」。

均嘆可惜 「無諗過0分鐘」

中場顏卓彬亦同到碧咸、蘇亞雷斯以至梁朝偉合照,喺球場上又可同布斯基斯交手,仍遺憾未能同美斯交手,亦理解球迷鼓譟,「諗過佢上陣時間唔多,但無諗過0分鐘。感覺佢今次好攰,飛來飛去踢友誼賽,可能都要休息好啲準備美職開季」。「老大哥」門將葉鴻輝都覺得「有少少可惜」,「好難得有機會可同世界級球星較量」,但話都好享受今場比賽。

相關字詞﹕國際邁阿密 美斯

上 / 下一篇新聞