港聞

港聞二

【Emily】盛事噓聲中落幕 碧咸繞場一周安撫 鍾國斌自喻「38,000水魚之一」 唯一安慰港隊好波

【明報專訊】美職球會國際邁阿密對「港隊」表演賽,事前大家唔知球王美斯會否落場,開場時氣氛熱爆,場內真正星光熠熠,政商影藝界名人雲集,又有當紅歌手表演。惟美斯無落場惹來唔少球迷不滿,班主碧咸賽後都安撫球迷,繞場一周向球迷拍掌致謝。

朝偉詩蓓小小超 名人盡出

昨日所見,除咗主禮嘅特首李家超,以及主事嘅文體旅局長楊潤雄,財政司長陳茂波、副司長黃偉綸都在場。前特首梁振英、曾蔭權,前財爺曾俊華都喺度。盈科拓展集團創辦人兼主席李澤楷喺貴賓廂座同人有講有笑。

影帝梁朝偉、劉嘉玲更同碧咸寒暄,及合照留念。「女飛魚」何詩蓓喺賽前同碧咸交談,佢話對方知道自己將出戰巴黎奧運,叫佢加油,碧咸仲向佢推介當地一間餐廳,形容係一個難忘經歷。

大會將活動搞成嘉年華咁,邀請人氣歌手獻藝。首先由湯令山(Gareth. T)打頭陣獻唱《勁浪漫 超溫馨》等兩首歌;MIRROR成員姜濤就同舞蹈員一齊跳唱新歌《黑月》;盧瀚霆(Anson Lo)則表演On,兩人隨後一同跳唱MIRROR團歌Rumours,獲現場姜糖及神徒舉牌支持。

壓軸表演嘅鄧紫棋(G.E.M.)於開場前睇準時機同碧咸交談,問碧咸可否喺佢球衣背面簽名,仲成功合照,最後兩人來個抱抱。不過,當賽事結束,大家睇唔到美斯落場時,現場氣氛逆轉,當特首李家超與主禮代表步出草地準備頒獎時,現場已現噓聲、 「回水」(退款)聲,到咗尾聲鄧紫棋獻唱Amazing Grace時更係噓聲不斷。自由黨立法會前議員鍾國斌賽後話自己係「38,000個水魚之一」,話聽到全場叫回水,唯一安慰係港隊打得好好。

相關字詞﹕碧咸 國際邁阿密 美斯

上 / 下一篇新聞