港聞

港聞二

【Emily】1999年上任 請唔到人 劉靳麗娟續做女拔校長

【明報專訊】名校拔萃女書院嘅校長劉靳麗娟(圖)由1999年起上任,在任至少24年,原定做埋今個學年就退休,不過學校校監余嘉寶噚日就向家長、教職員及學生等發通告,表示經過一段時間努力,仍未物色到適合人選接任校長一職,因此宣布劉太繼續留任。拔萃女書院早於前年招聘校長,並要求今年9月新學年到任,最終校方未招聘到新校長。校方噚日通告未有交代劉太留任嘅年期、招聘程序會唔會繼續。

未交代留任年期續招聘否

劉靳麗娟係財經事務及庫務局前局長劉怡翔嘅太太,曾在女拔讀書,之後去咗加拿大讀大學,1990年返母校教書,1999年擔任校長至今。劉太以往擔任多項公職,係現任學界體育聯會董事會主席,亦做過6年婦女事務委員會主席。

劉太另外係青海省第11屆政協委員,政協網頁資料顯示佢1954年8月出生,即係現年69歲。根據《教育條例》,資助學校嘅教員及校長嘅退休年齡係60歲,不過法例對直資學校就冇特別規定。Emily問學校有冇訂明退休年齡、劉太今次任期幾耐、招聘校長程序會唔會繼續,截稿前未獲回覆。

上 / 下一篇新聞