港聞

港聞二

【Emily】故宮展8寶 迎「龍」曆新年 開小紅書微信號 盼吸灣區年輕人

【明報專訊】「龍」曆新年就到,香港故宮文化博物館會展出8件同龍年有關嘅文物應節,包括即日起喺展廳一展出《雍正帝臨雍講學圖》,呢卷講學圖描繪300年前,咁啱同為甲辰龍年嘅三月初一,清代皇帝雍正當時坐喺國子監親自講學。故宮館話會努力吸客,已開通小紅書及微信等社交媒體帳號,希望吸引大灣區嘅年輕人嚟參觀。

故宮文化博物館8件展品橫跨明清兩朝,最早期可以追溯至十五世紀明朝永樂時期,其中擺放喺展廳一嘅仲有體現天子至高無上權力嘅政治象徵交龍紐《制誥之寶》,方形寶璽以玉石雕刻,紐嘅形狀為象徵帝王嘅龍,當時負責典守印璽嘅專職官員會根據皇帝旨意用印。

去年125萬訪客 內地客今已升至五成

故官館館長吳志華話,去年有125萬人次到訪故宮,其中20萬來自海外、45萬來自內地,港人佔逾60萬;不過,內地客比例現已升至五成,有信心內地客會增加。吳並期望今年參觀人數能超越舊年,另預計今年會推出7個新展覽,包括4個特別展覽。

提提你,故宮文化博物館農曆大年初一及大年初二休館。

至於中文大學文物館,就會喺本周五(2月2日)至7月31日舉辦「甲辰說龍」特別展覽應節,市民唔使錢就可以飽覽逾50件館藏文物,涵蓋玉石、甲骨、金銅及陶瓷等類別,當中包括設計文物館館徽時參考嘅西漢「綠松石雙面肖形印」、五代至北宋「白玉團龍紋穿心盒」等。

上 / 下一篇新聞