港聞

港聞二

【Emily】「放血論」被解讀開水喉 曾俊華澄清係指減開支

【明報專訊】財政司長陳茂波下月28日發表《財政預算案》,前財爺曾俊華早前喺facebook出帖,提出本港處於經濟轉折關口,現時不宜加稅,反而應在財政開支「放血」,被解讀為支持政府財赤下仍開水喉增開支。曾俊華事隔一周澄清,話「放血」係指點樣可以喺唔會對民生造成重大影響嘅前提下,減少開支,「以前我哋叫呢啲做『放血』」,仲話「不認還需認,我哋已經進入結構性赤字嘅年代」。

曾俊華早前出帖話呢個時間應要喺支出方面「放血」,話做呢樣嘢短期嚟講會傷身,但如果係正確嘅嘢,就要畀啲勇氣去堅持。佢噚日解釋,如果要擺脫財政「赤的疑惑」,返回《基本法》要求嘅量入為出狀態,財政司長都要諗吓可以點樣增加收入,但今時今日可以用嘅工具確實唔多。佢又話,政府都要喺支出方面入手,睇下點樣可以喺唔會對民生造成重大影響嘅前提下,減少開支。

曾俊華話如果削開支,意味可能會影響到公務員人數,或者一啲社會服務,形容呢個一定係痛苦同唔會受歡迎嘅措施,但若再唔做嘢,香港日後可能會好似美國咁,要借貸度日,提出如要下一代還債,咁樣係咪公平呢。

相關字詞﹕結構性財赤 財政預算案 曾俊華

上 / 下一篇新聞