【Emily】中大政政系重組 學生主場諮詢會告吹 院長離港唔出席 關注組改網上調查

【明報專訊】中文大學政治與行政學系正值重組，校方將政政系同全球研究、數據科學與政策研究課程組成一個新學院，但一直有學生代表擔心政政系日後角色被矮化。「政政合併關注組」日前喺Instagram宣布搞學生主場諮詢會，但因為社會科學院院長趙志裕離港唔會出席，諮詢會決定取消。關注組噚日改為做網上問卷調查，了解持份者係咪支持改組、校方諮詢係咪足夠等，下周一（4日）晚截止，希望趕及下周三（6日）校方開教務會時，喺會上討論調查結果，同時希望校方暫緩改組。