【明報專訊】城大般哥展覽館最新展覽「盛世聚首天寶芳華：圓明園獸首暨文物展」第二期噚日開幕，展覽叫做文物展，但全套十二生肖獸首雕塑係出自電影《十二生肖》，由影星成龍捐贈畀新加坡亞洲文明博物館，今次呢批仿製品就借畀城大展出，藉此解說水力噴泉裝置嘅巧妙之處。至於其餘展品，除咗有40件青銅文物，包括春秋時代嘅龍紋鼎等青銅禮器之外，亦有部分仿真嘅清朝畫作。
展覽仲提供咗各種沉浸式體驗，包括利用擴增實境（AR）、混合實境（MR）、人工智能（AI）技術嘅互動體驗，畀大家用唔同方式認識展品。今次展覽由城大及新加坡亞洲文明博物館合作，11月30日結束。
般哥展覽館喺今年7月搞第一期展覽，當時真係借咗圓明園獸首銅像原物，包括牛、虎、猴、豬共4件。
相關字詞﹕城大