【明報專訊】經民聯早前成立7個地區支部，噚日各支部代表同傳媒茶敘，當中不乏喺社區服務多年嘅前區議員，包括油尖旺支部主席黃舒明，佢曾經擔任3屆區議員，做過油尖旺區議會副主席；油尖旺支部副主席陳少棠亦喺同區佐敦西做過議員，2019年落選；經民聯港島支部主席丁煌喺2019年曾參選東區太古城西區，大比數輸畀趙家賢，趙其後因初選案被捕，還押至今；港島南支部主席賴家智為現任南區防火委員會委員。對於年底區議會選舉，在場傳媒當然想知道經民聯點部署，有支部成員向Emily透露，基本上已同喺地區有實力嘅政黨協調過，唔會出現「爭位」。