【明報專訊】特首李家超繼續訪京行程，多名隨行嘅局長亦各有節目。醫衛局長盧寵茂前日到訪中國器官移植發展基金會，之後仲特別寄咗張由基金會印製嘅明信片，畀上年底喺香港兒童醫院接受內地心臟移植嘅BB女芷希。明信片背面係水墨繪畫嘅大熊貓，對眼改用代表基金會嘅紅同藍色，盧寵茂就喺另一面寫上「早日康復，快高長大！」Emily相信芷希大個識字睇番，肯定感受到局長對佢嘅關心！
鄧炳強布鞋老店歎新派咖啡
保安局長鄧炳強去到北京唔飲茶，由駐京嘅紀律部隊同事帶咗去布鞋老字號「內聯升」店內開設嘅咖啡店「大內．宮保」，坐喺上層露台歎咖啡。鄧炳強噚日喺facebook分享，話地道美食加上新派咖啡，傳統同潮流結合得天衣無縫，畀着自己去真係唔識搵。