【明報專訊】離開政府多年嘅前律政司長袁國強（Rimsky），近日少有咁開金口，緬懷住大學宿舍嘅日子，佢話珍重當年純真嘅友誼，讀書時可以玩得好癲，又可以互相提點。
喺港大聖約翰學院（St. John's College）住足4年嘅Rimsky，趁學院今年同港大一齊慶祝111周年接受宿友訪問。當年做過學院學生會外務副主席嘅Rimsky話，當年正值中英就香港前途談判，學生有時幾乎通宵開會草擬聲明回應，笑言有時「唔知點解硬係開會開好耐」。佢話喺校外開會時會表達大學生嘅睇法，同時又要向同儕交代外面嘅情况，「感受到大學生同社會其他人，無論有無政治背景，不同群組對同一件事好唔同睇法」。
寄語師弟妹留意國際 宏觀分析
被問對師弟師妹有無咩建議，佢話希望同學喺讀書時期培養留意國際局勢嘅視野，「喺香港做事，無國際、宏觀啲睇法，會比較難同自己定位」。佢又話好多事情唔止一個角度，除持平睇法，可以考慮多角度分析一件事，無論做咩行業，都會比較圓滿。