【明報專訊】特首李家超喺舊年《施政報告》提出每年搞香港流行文化節，今年第一年由政府牽頭，頭炮活動包括4月一連兩日喺伊利沙伯體育館舉辦音樂會，搵年輕歌手演繹橫跨1980年代至近代嘅歌曲，包括已故巨星「哥哥」張國榮、「梅姐」梅艷芳同埋已故作曲人顧嘉煇等人嘅作品，演出嘅本地歌手包括吳業坤、林欣彤等，未見近年大受歡迎嘅MIRROR；演唱會要收費，4種票價由220至520元不等。
文體旅局噚日亦向立法會提交文件，提到流行文化節喺頭幾年，將重點介紹1960年至1990年代「香港流行文化黃金時期領導亞太潮流」嘅代表人物，包括「哥哥」同「梅姐」等，希望吸引年輕一代同世界各地觀眾。
另有「青年自主」busking演唱會
除咗音樂會，展覽、電影放映等20幾場活動，局方話仲有由「青年人自主」嘅街頭表演（busking）形式演唱會。Emily記得，以往無「在公眾街道或道路奏玩樂器許可證」係可被票控，不過相信今次官方搞busking，一定「有牌」啦！局方預計文化節可以吸引14萬觀眾現場參與。
相關字詞﹕流行文化節
