【明報專訊】立法會會議廳本月初更換防干擾功能嘅咪高峰系統，噚日（15日）首次使用新系統開會，會議廳音響出現發言者重複「疊聲」情况，最終要暫停會議近5分鐘處理。秘書處回應話，問題與新咪高峰系統完全無關，只係有電視機靜音功能故障，發出聲響影響會議。
副醫務衛生局長李夏茵噚日早上回應首項議員質詢，發言期間佢嘅聲線出現「疊聲」。立法會秘書處解釋，會議廳公眾席及記者席嘅電視直播畫面本應喺會議期間設為靜音，惟噚日其中一部電視機靜音功能故障，結果發出聲響影響到會議進行。
立法會噚日唔止音響系統「甩轆」，Emily下晝喺立法會1樓走廊見到一塊指示牌跌咗落地，指示牌面積約半米乘半米。秘書處回覆查詢話該細型指示板因膠貼不穩固而鬆脫，已隨即通知建築署，並促請其維修工人盡快處理。