【明報專訊】香港女生「絵麗奈」成為日本嘅AV女優，引起網民熱議，網上更流傳一份假冒政府新聞稿，以文化體育及旅遊局長楊潤雄之名，恭賀有港人「榮獲專屬女優身份」。政府噚日發聲明，嚴正澄清絕無透過政府新聞處新聞發布系統發出相關嘅虛假恭賀新聞稿，並已報警處理。警方就話，案件已交畀網絡安全及科技罪案調查科跟進，暫時無人被捕。
素海霖曾拍港片 網民：值得恭賀
噚日有AV片商公布旗下首個外籍洋將「絵麗奈」，有網民認出佢係曾經拍攝本港電影《#PTGF出租女友》嘅素海霖，佢並上過電視台節目。
早兩日馬來西亞華裔演員楊紫瓊獲得奧斯卡金像獎最佳女主角，楊潤雄即發文恭賀，話香港電影界孕育唔少傑出演員同電影工作者，楊紫瓊曾經喺香港發展多年，繼而進軍國際。而噚日喺網上流傳嘅假冒政府新聞公報，就用咗相似新聞公報內容，話「絵麗奈曾經在香港影壇發展多年，繼而進軍日本發光發亮」。
政府嘅澄清一出，本來已鬧得熱哄哄嘅社交平台隨即再掀起另一番熱議，有網民就話，絵麗奈身為香港人進軍AV界都係演員，亦值得恭賀。