【明報專訊】Emily近年留意到有啲街燈唔同咗樣，其實係路政署嘅「裝飾路燈更換計劃」，自2018年起裝飾40幾個港鐵站附近嘅路燈，總共完成咗超過1600支。參與計劃嘅路政署工程師王嘉強（Mike）喺公務員事務局專頁話，每次選定推行計劃嘅港鐵站，佢都同園境部同事實地視察，視乎該區嘅歷史、附近景觀等，制訂裝飾燈柱同支架嘅主題同配色方案，又會轉用LED燈，可以慳約三成用電。
Mike舉例，葵芳港鐵站附近嘅燈柱用咗新燈具同支架外，亦採用白色同綠色嘅配搭，融合後面港鐵站外牆嘅顏色。有啲地區就按當區特色選材，好似上水港鐵站喺雙魚河附近，工程團隊就喺港鐵站出入口嘅燈柱加入魚嘅元素，喺黃大仙竹園邨附近嘅燈柱就會貼上竹樹圖案。