【明報專訊】政府首長茲事體大，一般多係選舉產生或中央政府任命。Emily留意到，英國政府近期以公務員合約公開招聘英國屬地直布羅陀嘅總督（governor）。雖然總督係代表英王喺當地嘅最高代表，甚至係駐軍總司令同埋有官邸，但似乎人工相對就麻麻，起薪年薪得9.5萬英鎊，即月薪約7萬幾港元，仲少過香港嘅立法會議員，另加海外工作津貼。
直布羅陀位處地中海入口，傳統上係軍事要塞，過去歷任總督唔少都係將軍。根據英國外交部招聘細則，總督負責防務同內部保安，所以要同英國國防部、空軍等部門評估任何對直布羅陀或英國嘅潛在威脅。
英國外交部話歡迎任何背景嘅英國公務員報名。不過份工只限「三粒星」嘅英國公民報名，同埋10年內至少一半時間居英，仲要做滿4年合約。
相關字詞﹕直布羅陀
