【明報專訊】立法會會議廳入面，每個位都有個咪高峰畀官員同議員發言時用，立法會主席梁君彥話，個咪高峰系統早喺2011年搬入大樓時已經安裝，即係用咗超過10年，當時系統無特別安裝防干擾功能。事至今日，幾乎人人手機在身，好多議員仲帶埋平板電腦去開會，但手機接收信息時會干擾到個咪高峰系統，產生雜音造成滋擾。
近排北京舉行兩會，立法會休會約兩星期，梁君彥話秘書處資訊科技組趁呢段時間換咗會議廳嘅音效系統，包括130多支咪。
梁君彥感謝香港生產力促進局畀專業意見，協助秘書處評估問題成因，合力揀選咗一套較先進、最緊要具備防干擾功能嘅咪高峰系統，仲針對電磁干擾做咗測試，同埋評估音效質素，大大改善咗問題。