【明報專訊】繼「安心出行」今年1月正式停運後，資科辦噚日喺facebook宣布，「香港健康碼」亦已停止運作，並完成刪除系統上全部用戶資料，包括曾經透過安心出行上傳嘅出行紀錄，強調一直按機制喺上傳後60日刪除全部出行紀錄，嚴格遵從《私隱條例》要求。
Emily睇番之前報道，資科辦喺今年1月安心出行停運後，立即按衛生署指示刪除所有確診個案上傳嘅出行紀錄。不過據資科辦噚日講法，似乎當時未有移除已上載港康碼嘅紀錄，而係等到啲紀錄夠60日先刪除。
資科辦書面答覆Emily話，港康碼系統自2021年12月10日推出以來，共接獲80萬名市民申請註冊帳戶，而中港兩地自今年1月8日開始分階段通關，市民唔需要再用港康碼入境內地，至上月6日全面通關後，資科辦隨即安排系統停止服務同刪除資料。資科辦又話，𠵱家所有資料已刪除，至於個別曾透過安心出行上傳去港康碼系統嘅出行紀錄，就係按機制上傳60日後全部刪除。