【明報專訊】身兼行會召集人嘅新民黨主席葉劉淑儀平時喺社交平台都幾活躍，過時過節都會上載自己嘅相吸吓like。噚日葉太嘅Instagram（IG）一度上載多張疑似惡搞圖（meme），葉太嘅人像key咗落花卉展嘅相入面，配上「Hell no Hong Kong」（香港，咪搞）嘅字句。有關圖片喺網上流傳約一個鐘頭之後就被刪除，令人懷疑係咪有黑客入侵。
葉太同Emily解釋並唔係IG畀黑客入侵，純粹係唔小心上載咗批相。佢又大方承認自己搞錯，唔關團隊事。葉太向英文網媒HKFP話，自己開會期間一心多用，上載咗呢批圖片，無睇清楚字眼，又話對事件感到尷尬。
睇番葉太IG，前兩日先上載過類型差唔多嘅惡搞圖，見到攞住個月餅嘅葉太輕倚花叢中，吸咗4000幾個like。有網民當時質疑佢唔知咩叫meme，葉太仲反駁話CNN主播同佢啱啱討論完。Emily又留意到，原來葉太係親自管理IG同Twitter，佢解釋同事主要服務成個新民黨，唔會有一批人專門管理佢嘅社交平台。
相關字詞﹕葉劉淑儀