【明報專訊】公立醫院近日意外連連，醫管局更被詬病無及時公布事故，至近日似乎事無大小都會先公布。大埔那打素醫院噚日公布，內科病房一支牀頭燈組件鬆脫和移位，無人受傷，病房運作維持正常。有病人組織認為，醫管局管理層近日承受唔少壓力，相信𠵱家對佢哋嚟講「冇嘢係小事」。
大埔那打素醫院公布，前晚（11日）約9點半接到職員報告，事發後即時透過「早期事故通報系統」，向醫管局總部呈報，工程人員噚日凌晨已完成檢查同維修牀頭燈，並會詳細調查成因，亦已安排檢查院內其他同類裝置，預計今日完成。
香港病人政策連線主席林志釉估計，醫管局短期內公布嘅事故必定愈來愈多，「報咗無harm（傷害）嘅」，由公眾決定事故嚴重程度，相反如無公布，「小事咪冇事，如果係大事就真係大件事」。港大學者薛達就喺社交平台話，如可負擔，購置醫療保險係負責任做法，又話公立醫院當然需要增加技術人手，但喺有限嘅工作空間、設備同訓練下，可加嘅人手都有限。
