【明報專訊】因為疫情停辦3年、由康文署主辦嘅香港花卉展覽（花展）今日起一連10日喺維園舉行，主題為「繡麗綻放、幸福滿載」。花展會展出大約40萬棵花，包括4萬棵「主題花」繡球花，到場嘅市民可以投奔花花世界打卡同欣賞花海。花展每日朝九晚九開放，有225個機構參與，包括72個來自10個國家嘅參展機構。
停3年後復辦 今起維園一連10日
花展嘅特色景點之一係鮮艷奪目嘅立體繡球花花牆同花圃，共有8朵由不同植物細心鑲嵌成的「巨型繡球花」，其中一朵直徑超過兩米。另外，中央大草坪新增一大片毛地黃花海，亦係花展焦點之一；花展每晚7點半及8點半另外會上演燈光音樂匯演。
為宣傳今年花展，文化體育及旅遊局facebook噚日上載咗短片，局長楊潤雄、副局長劉震、政治助理招文亮粉墨登場身穿華服，佢哋各人以「潤雄兄」、「劉震兄」、「文亮兄」相稱，並介紹花卉同詩詞歌賦嘅關係。及後民建聯郭玲麗、新民黨陳家珮亦著上華服出場，招文亮笑笑口話「咦，嗰兩個咪玲麗佳人同家佩佳人？」兩人即回應話「幾位公子都嚟賞花喎」，為宣傳交足戲。不過，有網民就留言提議「華服咁舒適，楊局長一於著華服返工啦」。