【明報專訊】噚日3月8號係國際婦女節，特首李家超就向5名女性問責局長同特首辦主任葉文娟表達祝福同敬意，佢哋仲一齊舉起心形手勢合照。李家超話婦女係社會嘅重要力量，以佢工作上遇到嘅女性為例，均具備能力、毅力同決心，喺各自崗位發揮所能、貢獻社會，值得敬重。
李家超話，一直重視同欣賞婦女嘅貢獻，應給予面對壓力同困難嘅女性更多支持和幫助，畀佢哋兼顧就業同家庭之餘，可以釋放潛能。佢提到，今屆政府成立「婦女自強基金」資助民間項目，未來會繼續建設共融社會。
人代政協切蛋糕 梁熙賀38歲生日
不同政界人物以各種方式慶祝婦女節，喺北京出席兩會嘅人大代表同政協委員一齊切蛋糕，人代梁美芬仲穿上桃紅色衣著。民建聯郭玲麗同新民黨陳家珮就著上華服、戴上髮簪合照，二人更以一身華服出席政府婦女節酒會。
律政司長林定國就話向全港撐起半邊天嘅女士致敬，指律政司近六成（59%）政府律師職系同事係女性，話佢哋心思靈巧、辯才了得。
民建聯議員梁熙亦獲得黨友祝福，喺3．8日子慶祝38歲生日，佢話感激媽媽當年忍受痛楚生咗佢，令婦女節成為媽媽嘅「受難日」。
相關字詞﹕婦女節