【明報專訊】港交所前日舉辦新春酒會，請晒全部外國駐港總領事出席，場內高朋滿座，Emily留意到，原來俄羅斯駐港總領事Igor Sagitov，同美國駐港澳總領事梅儒瑞以及一眾西方駐港總領事都同場出席。根據港交所公布嘅大合照，梅儒瑞同Sagitov只差一兩個身位。
由於俄烏戰爭，美國與盟友，同俄羅斯關係麻麻。有西方外交官同Emily講，一般會避免公開場合接觸或合照，但話西方國家同俄羅斯駐港領事都唔係第一次同場，過去政府就《施政報告》同《財政預算案》簡報畀外交官，大家都曾同場。
另一名外交官就話，今次場合係港交所做東，而非俄羅斯領事館嘅活動，所以性質好唔同。
今次港交所成功集齊多國外交官，港交所行政總裁歐冠昇話唔同外交官聚首一堂，席間討論點樣加強唔同市場同文化聯通性。
