【明報專訊】據報一名九旬老婦前日（6日）喺長沙灣擺檔賣栗子，稱去洗手間時將小販車臨時放置一旁，結果被充公。選委會立法會議員江玉歡噚日喺facebook專頁話，晚上拜訪陳婆婆，見到佢情緒低落。江玉歡引述陳婆婆話，前晚約7點半，見將近收工時間，就先去商場嘅洗手間，一來一回用咗至少半個鐘，剛好有執法人員就無牌小販問題巡視，陳婆婆返嚟就被指無牌經營，需沒收其流動攤檔。江話陳婆婆講到哽咽，佢希望當局盡快調查事件，並寬大處理，還持牌嘅陳婆婆公道。
江玉歡探望 盼調查還公道
江玉歡話，𠵱家本港小販因應時代轉變同發牌規管而式微，好多持牌人同陳婆婆一樣年長，牌照數目必會自然流失，惟流動小販係本港僅有嘅文化遺產。佢認為現行小販規管政策未夠人性化，牌照要每年續牌，受當局規管監察，但唔准喺有人流嘅地段擺賣，反問係咪要年邁嘅持牌小販推車去「山旮旯」擺賣維生？