【明報專訊】香港巴士路線繁多，識轉車可以慳番唔少時間。九巴噚日宣布，九巴及龍運全線31個轉車站已全部投入服務，其中最新嘅站位於九龍城、尖沙嘴、大圍、寶達、青衣及大埔廣福道，提醒乘客可以瀏覽「App 1933」九巴手機應用程式嘅全新轉車站頁面了解資訊。
九巴舉例話，如果想由啟德去深水埗，可以先去九龍城轉車站，然後有3條轉乘路線揀，包括2A（來往樂華至美孚）、6D（來往牛頭角至美孚）及98C（來往坑口（北）（將軍澳醫院）至美孚），兼且有4.2元轉乘優惠。九巴策劃及發展組經理李侃陵話，乘客可以等候多於一條路線前往目的地，又可以從原區走得更遠。
九巴亦會陸續推出有關呢31個轉車站嘅宣傳短片、主題曲等，宣揚轉乘嘅好處，幫助市民出街可以更優惠、便捷同埋環保。