【明報專訊】人大代表、政協上京開「兩會」要閉環管理，開完會無得出外食飯鬆一鬆，但大會都照顧周到，畀一班代表喺酒店都可以品嘗到北京美食。好多人去北京都會食嘅涮羊肉，噚日各人代喺北京飯店，就可以一人一鍋打邊爐做午餐，港區人代、教聯會主席黃錦良喺社交平台上載相片，見到酒店提供羊肉、雞毛菜等地道食材，仲有大量蔬菜。
黃錦良仲話，閉環管理下，食飯時「放寬」至六人一枱，唔使一人一枱，而火鍋係一人一鍋，大家食得放心。Emily睇相，餐廳仲有二人細枱，黃錦良同互聯網專業協會會長冼漢廸坐埋一枱，隔籬枱、前運房局長陳帆就「獨食」。
全國政協及人大會議喺過去嘅周六周日開幕，無論係新任或續任嘅人代政協都不忘喺門外「打卡」，不過Emily聽聞，各人都唔可以帶手提電話入大會堂，合照就只能喺門外或酒店駐地。各政協按所屬界別獲安排不同酒店，屬社福保障界政協嘅管浩鳴同港區政協唔係同一間酒店，但就可享「福利」，因為佢同文化、體育界政協一間酒店，可以一次過同甄子丹、男高音歌唱家莫華倫、國家一級演員靳東等合照「集郵」。