【明報專訊】民主黨辦春茗一波多折，繼被酒店、酒樓臨時甩底、「緊急維修」關門唔接生意後，本來有一間北角酒樓願承投生意，但最新消息係民主黨以唔想為酒樓及街坊帶來麻煩為由，已經取消咗辦大型春茗，費事繼續舉辦又令街坊掃興。不過，民主黨堅持「食飯無罪」，於是變陣，噚晚改為喺另一酒家低調開兩席，只供中委及一啲前議員「小圈子」春茗聚會。
堅持食飯無罪 與黨分歧李華明出席
參加飯敘者唔少都係民主黨元老或前核心成員，除咗現任主席羅健熙，仲有前主席楊森、劉慧卿，同前議員黃碧雲、涂謹申。之前同民主黨因係咪參選立法會問題有分歧嘅李華明都同枱食飯。
民主黨原計劃去年7月搞聚會，但當時酒家臨時指場地附近有「群組確診情况」，要關閉清潔。民主黨其後再覓場地，租用將軍澳一酒店場地，但酒店之後又推咗。到上月，佐敦一間酒店答應承辦，但宴會前兩日又話要「緊急維修」。民主黨上月20日轉場葵涌一間酒家，最終宴會前兩小時獲通知無煤氣，指要「緊急維修」，暫停晚市。
民主黨其後與北角一間酒樓接洽，本計劃於3月16號晚設宴20席，並指該酒樓在商言商接生意，唔擔心維修問題，但活動最後擱置。