【明報專訊】政府正檢討港鐵票價可加可減機制，立法會「A4聯盟」張欣宇、楊永杰、梁文廣、林素蔚早前提出檢討建議，噚日就整埋動畫短片，以圖表、公仔等方式推銷佢哋嘅方案。聯盟話過去10年機制下港鐵票價加多減少，佢哋就提出引入利潤對冲機制，即係「賺得愈多，加得愈少」，如賺到好多好多，就無得加咁話。
佢哋提出，可加可減機制嘅方程式唔變，但要睇埋利潤金額，如果利潤低於50億元，票價加幅七五折；賺50億至100億元就五折；如賺100億至150億元就二五折；如果賺多過150億元就無得加。佢哋話2019年港鐵本身可加3.3％，若按佢哋嘅建議計算，加幅打折後只可以加1.05％。佢哋話方案簡單，認為係「雙贏」方案。