【明報專訊】全國政協、人大會議今明兩日喺北京開幕，雖然北京幾乎已取消晒防疫措施，但當局都好謹慎，繼續閉環管理，近兩日上京嘅港區人代政協，大部分時間要留喺酒店，有政協就準備十足，好似社福界政協管浩鳴咁，同其他港區政協住唔同酒店嘅佢帶咗幾大包果仁同即冲麥片，必要時可以頂吓肚餓，不過佢最特別就係帶埋隻貓公仔上京開會。
管牧向來係愛貓之人，特別係家中嘅Mimi，所以就帶埋Mimi嘅公仔陪佢，「一解相思之苦」咁話。3月嘅北京相對和暖，但非常乾燥，Emily知道有人代政協帶埋小型放濕機，保持房間嘅濕度。
政協一日三餐酒店解決 每日驗核酸
至於港區政協就住同一間酒店，Emily問過，佢哋一日三餐幾乎都留喺酒店，多數係指定時段去酒店餐廳食自助餐，而除咗赴京前兩日要做核酸檢測外，到咗北京之後每日都要喺酒店做驗核酸，以防萬一。
兩會期間，長安大街嘅保安比平日嚴謹，多個人大代表團入住嘅北京飯店，外圍都架起鐵欄，閘外有保安駐守，途人想舉機拍攝，保安都會加倍留意，停留耐少少仲會畀人趕走，當有代表團旅遊巴即將到酒店，酒店外圍都會暫時封路，其他車同人都要讓路。