【明報專訊】復常路上，醫務衛生局長盧寵茂總予人小心謹慎嘅感覺，試過幾次開腔強調某啲措施好重要，無耐特首李家超就宣布放寬。盧寵茂接受網媒「香港01」專訪，被問網上有人以此講笑話當覺得被上司針對，就要諗吓我哋嘅醫衛局長時，盧就形容同特首關係好似家庭入面嘅父母，「永遠有一個做好人、一個做衰人」，說話一個緊啲、一個鬆啲，不過最終目標同政策都係一致。
盧強調，特首作為上司有充分尊重醫衛局提出嘅意見，醫衛局係從衛生角度出發，特首就更高層次；佢又話，事實證明政府方向好穩定、無行回頭路，係政府嘅一個決策，「因為我哋只係一個政府」。
稱第五波「成功下嘅受害者」
社會之前熱論政府應否獨立調查抗疫，盧寵茂事隔一個幾月再被問及立場，佢認為以「持續改善、分開嘅形式」檢討更符成本效益；並形容香港頭兩年抗疫非常成功，第五波就係「victim of our own success」（自己成功下嘅受害者）。佢亦拒評上屆政府做法，「事後孔明好容易」。
