【明報專訊】全國兩會即將喺北京舉行，唔少人要北上，立法會因而休會，唔少議員就趁唔使開會外訪。民建聯多名立法會議員，同九巴代表噚日去咗深圳比亞迪總部，參觀新能源車及刺針實驗等，又乘搭坪山雲巴市政線，體驗新能源——雲巴運輸系統。
參與活動嘅包括陳恒鑌、陳克勤、葛珮帆、顏汶羽、劉國勳、林琳及黃俊碩。葛珮帆話，首站先去坪山區試乘電動「雲巴」，話當地人稱雲巴為「天上的巴士」，因為雲巴係高架系統，車身比較細，入閘可以使用電子車票或人面識別系統，站台無人化以降低人力成本，行駛速度唔高，但行車寧靜。
陳恒鑌話，九巴較早前引入咗多輛電能巴士試行，效果理想，據悉九巴未來將引進更多電能巴士，而佢哋噚日考察，認為內地電動車技術發展迅速，期待巴士公司引進更多電能巴士。
勞聯議員林振昇就去咗澳門，同澳門工聯會成員及立法會議員交流，話新冠疫情以來大家3年無見，高興可以親身交流。