【明報專訊】香港噚日全面撤銷口罩令，街上仍有唔少人繼續戴口罩防疫，部分政府官員就率先除罩，不論副政務司長卓永興去國際珠寶展，定係勞福局長孫玉菡去視察招聘中心，都以真面目示人。
貿發局主辦嘅香港國際珠寶展暨香港國際鑽石、寶石及珍珠展首日人頭湧湧，卓永興喺facebook話，見到嘅中外人士都係「一張張笑臉」，大家可以用真面目示人，感到十分雀躍。
孫玉菡就去咗飲食業招聘中心同零售業招聘中心，了解勞工處喺口罩令撤銷同經濟活動復常後加強就業服務嘅情况，照片所見，唔少同局長交流嘅職員都戴口罩。
特首李家超噚日出席同港區全國政協委員嘅座談會都除罩，佢今朝會率團去澳門訪問，同澳門特首賀一誠會面，係全面通關後首次訪澳。