【明報專訊】民主黨辦春茗一波三折，之前承接生意嘅酒店或酒樓一係臨時甩底，一係就開席前話要「緊急維修」關門。不過，民主黨春茗未絕望，有民主黨人同Emily講，北角有間酒樓話唔怕惹麻煩，在商言商肯接呢單生意。民主黨計劃3月16號晚設宴，有黨中人笑言呢間酒樓接得生意都應該有晒心理準備，估計事前會做好各項檢查，無理由又要開席前做「緊急維修」。
民主黨人同Emily講，計劃筵開20圍，主要畀黨友同友好街坊聚吓，按主席羅健熙之前咁講，「都係食餐飯啫」。民主黨人話佢哋前幾次一直低調籌辦，但臨尾都因為食肆出問題而搞唔成，今次都已唔介意早啲公布、早啲通知黨友，如果仍然有阻滯，就只能見步行步。
民主黨舊年7月已想搞聚會，但當時酒家臨時話場地附近有「群組確診情况」，要關閉清潔。民主黨再搵場，租用將軍澳一間酒店嘅場地，但酒店之後又推咗。到咗上個月，佐敦一間酒店原本願承辦，但宴會前兩日又話要「緊急維修」。民主黨上月20日轉場葵涌一間酒家，最終宴會前兩個鐘通知無煤氣，要「緊急維修」唔做晚市。
