【明報專訊】專欄作家屈穎妍（左圖）批評聖士提反女子中學校長阻止軍裝警入校處理學生危坐事件，該校校董會前日（27日）發聲明反駁有關說法不實，屈穎妍同日狙擊，話不滿校方未解釋有無出言拒警入校。身兼該校校監嘅立法會議員管浩鳴（右圖）噚日就出聲明，話「經調查，沒有發現校長涉及報道中的事情」。
屈穎妍前日撰文，點名提及校監管浩鳴，話據知校長向校監及校董會解釋最初拒警入內嘅原因，係怕軍裝警察「嚇親學生」，事後警察都入到校園，所以唔存在敵視警察之意。
噚日下晝管浩鳴就經校網張貼回應，話作為校監，對近日有關拒絕警務人員進入校舍嘅報道深表關注，強調經調查，無發現校長涉及報道中嘅事情。佢又話必定以「是其是、非其非」嘅態度，公平公正咁處理事件，校方定必全力配合警方嘅工作。
聖士提反女子中學上月14日因為有學生危坐，警方及消防人員到場協助，屈穎妍上周五（2月24日）喺網媒「港人講地」刊出文章，指控校長唔畀軍裝警入校，校方前日發聲明話對不實評述及指摘「深感忿慨」；屈同日再撰文話校方未回應校長係咪曾出言阻止，亦未解釋軍裝女警點解要披件非制服嘅外套入學校。