【明報專訊】人工智能（AI）聊天機器人ChatGPT自舊年11月推出以嚟風靡全球，勞聯主席兼立法會選委界別議員林振昇（圖）噚日都趕上熱潮，問ChatGPT制訂標準工時對香港社會嘅整體發展有乜嘢好處，結果ChatGPT提出五大觀點，包括可以保障勞工權益、提高生產力、促進就業機會、尋找就業機會，以及調節勞動市場。林振昇大讚ChatGPT有就各點詳細闡述，話覺得佢好厲害。
喺提高生產力方面，ChatGPT話過長嘅工時可能會對勞工嘅健康同工作效率造成負面影響，合理工時可提高生產力同工作效率；促進就業機會方面，ChatGPT就話標準工時可以畀勞工有更多空閒時間，喺其他領域搵就業機會，促進整個就業市場發展。
講開人力問題，會計界議員黃俊碩就同工聯會合辦會計業招聘會，即時有初級審計人員、初級會計人員及公司秘書助理等接近200個職位空缺即場面試。黃俊碩話，業界人手不足問題嚴重，據業內評估空缺高達8000個，話對業界長遠發展構成巨大阻礙。