【明報專訊】今屆政府提出資助非政府機構租用酒店或旅館，轉為青年宿舍，菁英會亦計劃參與。菁英會主席凌俊傑話同多間酒店商討緊合作轉為青年宿舍，目標係惠及約300個年輕人，正物色交通方便同配套齊備嘅酒店，詳情稍後公布。
菁英會噚日舉行傳媒午宴，主席凌俊傑、副主席黃進達等成員出席。菁英會介紹新一年工作計劃，包括積極配合政府推出嘅《青年發展藍圖》，除咗參與青年宿舍計劃，亦會申請「青年正向思維活動資助計劃」嘅撥款。佢哋建議邀請工匠教青年做手作，之後會幫參加者將手作變成產品，向市場推銷，仲會辦展覽展示成果。另外，菁英會亦會積極搞各類交流團，趁通關後帶香港青年去內地考察交流。
新一屆人大政協兩會3月4日同5日喺北京開幕，身兼全國政協嘅凌俊傑作為「新丁」，都話相當緊張。佢透露兩會提案主要關注青年、創業等議題，包括產品專利等。