【明報專訊】新冠疫情持續3年，唔少安老院舍嘅長者一度因「封院」而同家人隔絕。市建局伙拍黃金時代基金會，舊年10月推出為期半年嘅先導計劃「健齡樂聚」長者活動，以深水埗3間私營安老院舍做試點，透過智齡科技、探訪及藝術活動，照顧長者身心靈需要，惠及約80個老人家。
「健齡樂聚」善用科技，喺3間安老院舍設置智齡機械人「金醫生」，院友可透過「金醫生」同親朋好友視訊聯絡，仲有互動娛樂等。另外，計劃亦招募10個義工及護理學院學生到院舍探訪，同時聯同「ADAM藝全人」嘅展能藝術家，同院友一齊畫畫。
黃金時代基金會營運總監黃惠娜話期望呢個計劃係好嘅開始，可以循正確方向前行。受惠院舍松恩護老之家負責人江姑娘話，計劃嘅活動有助加強長者手腳靈活度，同時減輕院舍工作量，紓緩人手不足嘅壓力。義工Margaret話活動有助跨代溝通合作，學習關愛。
相關字詞﹕市建局